Мулоқоти Фарҳод Раҳимов бо Ли Ҷен Сен

Душанбе, 11 декабр. (АМИТ “Ховар”,Фарзона Достонзода).-Дирӯз дар шаҳри Душанбе вохурии президенти Академияи илмҳои Ҷумҳурии Тоҷикистон Фарҳод Раҳимов бо ноиби президенти Академияи илмҳои ҷамъиятшиносии Чумҳурии Мардумии Чин Ли Ҷен Сен баргузор гардид.Тавре ки ба АМИТ “Ховар” аз Академияи илмҳои ҷумҳурӣ иттилоъ доданд, дар вохӯрӣ ҷамбаҳои ҳамкории илмии ду академия баррасӣ гардиданд.Президенти Академияи илмҳо Фарҳод Раҳимов аз ёддошти тафоҳуми ба имзо расида байни ду академия (13 майи соли 2013) ёдовар шуда, пешниҳод намуд, ки барои беҳтар намудани ҳамкориҳои дуҷонибаи академияҳо гуруҳи корӣ ташкил шавад. Ноиби президенти Академияи илмҳо Кароматулло Олимов дар мулоқот пешниҳод намуд, ки дар мавзӯи терроризм ва экстремизм форуми муштарак дар Тоҷикистон баргузор шавад.Ли Ҷен Сен пешниҳодҳои Академияи илмҳои Тоҷикистонро пазируфта, қайд намуд, ки бо Сафорати Тоҷикистон ҳамкориҳои хуб доранд ва ҳар сол дар Академия илмҳои ҷамъиятшиносии Чин мизи мудаввар оид ба рушди ҳамкориҳо доир мегардад. Дар фарҷоми мулоқот зикр шуд, ки то моҳи марти соли оянда бояд гуруҳҳои кории ҳарду ҷониб лоиҳаи созишномаи ҳамкориро таҳия ва пешниҳод намоянд, ки он самтҳои нави равобитро фарогир бошад.