Мулоқоти Сироҷиддин Аслов бо Ян Элиассон

Душанбе, 12 декабр. (АМИТ «Ховар»).- Чанде пеш дар шаҳри Ню – Йорк мулоқоти вазири корҳои хориҷии Ҷумҳурии Тоҷикистон Сироҷиддин Аслов бо Муовини аввали Дабири кулли СММ Ян Элиассон баргузор гардид. Тавре ки аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ хабар доданд, Ян Элиассон Сироҷиддин Асловро ба муносибати таъин шуданаш ба мансаби вазири корҳои хориҷии Ҷумҳурии Тоҷикистон аз номи Дабири кулли СММ, ки ҳоло барои боздид дар Африқои Ҷанубӣ мебошад, муборакбод карда, ба вай дар ин вазифаи нави масъулиятнок муваффақиятҳо орзу намуд. Муовини аввали Дабири кулли СММ дар ҷараёни сӯҳбат изҳор дошт, ки Тоҷикистон тайи солҳои охир ба таҳкими рӯзномаи бахши оби СММ, аз ҷумла роҳандозии Соли байналмилалии ҳамкорӣ дар бахши об ҳиссаи муҳим гузоштааст. Ян Элиассон ҳамчунин саъю кӯшишҳои Тоҷикистонро дар ҳалли масоили мубрам ва муқобилат ба хавфу хатари имрӯза, аз қабили тағйири иқлим, таъмини дастрасӣ ба энергияи устувор, коҳиш додани қашшоқӣ ва ғайра ба дараҷаи баланд арзёбӣ намуд. Вазири корҳои хориҷии Тоҷикистон дар навбати худ ба муовини аввали Дабири кулли СММ итминон дод, ки ҳамкории судманду бисёрҷонибаи байни Тоҷикистон ва СММ минбаъд ҳам давом дода мешавад.