Мушкилоти соҳаи китобдорӣ ва роҳҳои ҳалли он

Душанбе, 16 декабр. (АМИТ «Ховар», Зарангези Латиф).- «Мушкилоти соҳаи китобдорӣ ва роҳҳои ҳалли онҳо дар шуъбаҳои маорифи шаҳру ноҳияҳои ҷумҳурӣ»- таҳти чунин унвон дар Вазорати маориф ва илми Ҷумҳурии Тоҷикистон машварат бо мушовирони китоби шуъбаҳои маорифи шаҳру ноҳияҳои ҷумҳурӣ доир гардид. Дар машварат ҷараёни пардохти маблағи иҷораи китобҳои дарсӣ ва мушкилоти он, муаммоҳои қарзи шуъбаҳои маориф дар самти иҷораи китобҳои дарсӣ, сари вақт пардохт накардани маблағи иҷораи китобҳои дарсӣ ва амсоли ин мавриди баррасӣ қарор гирифт. Тавре ки директори Маркази таҳия, нашр ва муомилоти китобҳои дарсӣ, илмию методӣ К. Исоев иброз дошт, аз оғози соли 2013 Вазорати маориф ва илми ҶТ чопи 60 номгўй китоби дарсиро ба нақша гирифт, ки аз ин теъдод ҳудуди 50 адад чоп шуда, ба шуъбаҳои маорифи шаҳру ноҳияҳо дастрас гардиданд. Инчунин вазири маориф ва илми ҶТ Н.Саидов пешниҳод намуд, ки барои ба таҳсили ғоибона фаро гирифтани китобдорони муассисаҳои таълимӣ дар соҳаи китобдорӣ, оянда дар донишкадаву донишгоҳҳои минтақавӣ ихтисосҳои китобдорӣ таъсис хоҳанд дод.