Намоиши таҷҳизоти терминали нави мусофирон

Душанбе, 4 декабр. (АМИТ «Ховар», Кристина Эрлих).- Чанде пеш дар Фурудгоҳи байналмилалии шаҳри Душанбе маросими намоиши таҷҳизоти нав барои ба қайдгирии мусофирон, асбобҳои назорату муоинаи бағоҷ, ҳамчунин назорати шиносномаҳо баргузор гардид. Дар ин маросим навори ширкати «Винчи» намоиш дода шуд, ки дар он тамоми ҷараёни қабулу гусели мусофирон, аз ҷумла бақайдгирӣ, супурдани бағоҷ, назорати шиносномаҳо, ҳамчунин фуруд аз ҳавопаймо, гузаштан аз роҳрави махсус, гирифтани бағоҷ ва баромадан аз терминали нав тасвир ёфтааст. Дар ин бора котиби матбуоти Фурудгоҳи байналмилалии шаҳри Душанбе Маҳмадюсуф Шодиев ба мухбири АМИТ «Ховар» хабар дод.Директори лоиҳаи сохтмони терминали нави мусофирон Карим — ал — Семман навори ширкати «Винчи» — и Фаронсаро дар бораи истифодаи таҷҳизоти навтарини терминал шарҳ дода, қайд намуд, ки насби он оғоз ёфта ва ҳамаи хадамоти дахлдори фурудгоҳ бояд дар ин раванд иштирок намуда ва истифодаи онро ёд гиранд. Баъзе кормандони фурудгоҳ барои истифодаи таҷҳизоти навтарин дар Аврупо таҳсил менамоянд.