Омодагӣ ба номусоидии обу ҳаво

Душанбе, 12 декабр. (АМИТ «Ховар», Лутфия Эшонқулова).-Аз сабаби сард шудани ҳаво ва боришот, алалхусус боридани борон ва барфи зиёд, ки дар шабонарӯзи 16,17 ва 18-уми декабр дар назар дошта шудааст, вазири корҳои дохилӣ Рамазон Раҳимов ба ҷузъу томҳои вазорат, аз ҷумла Раёсати БДА, Сарраёсати хадамоти давлатии оташнишонӣ, Хадамоти «Муҳофиза»-и ВКД ва дигар воҳидҳо супориш дод, ки барои таъмини бехатарии ҳаракати нақлиёт дар роҳҳо, рафъи офатҳои табиӣ, аз ҷумла фаромадани тарма, омадани сел, лағжиши сангу хок, сар задани сӯхтор ва ғайра дар ҳолати омадабош қарор дошта бошанд.Тавре ки сомонаи расмии ВКД хабар медиҳад, ҳамчунин онҳо вазифадор шуданд, ки дар сурати рух додани ин гуна ҳодисаҳо ҳайати шахсии мақомоти корҳои дохилӣ дар ҷойҳо барои расонидани кӯмак ва бартараф намудани оқибати офатҳои табиӣ сафарбар шавад.