Сафари ҳайати АНМН ба вилояти Свердловски ФР

Душанбе, 11 декабр. (АМИТ «Ховар», Лутфия Эшонқулова).- Ҳайати Агентии назорати маводи нашъаовари назди Президенти Ҷумҳурии Тоҷикистон бо роҳбарии директори Агентӣ Рустам Назаров дар ҳошияи сафари хидматӣ ба шаҳрҳои Федератсияи Русия бо сардори Раёсати Хадамоти федералии назорати маводи нашъаовари Русия дар вилояти Свердловск Михаил Каган мулоқот анҷом дод. Назар ба хабари Агентии назорати маводи нашъаовар, ҷонибҳо дар ҷараёни мулоқот масоили ҳамкорӣ барои ҷилавгирии қочоқи маводи нашъаовар аз Ҷумҳурии Тоҷикистон ба Федератсияи Русияро мавриди муҳокима қарор дода, мавзӯи ҷилавгирии муштараки фаъолияти гуруҳҳои муташаккили ҷинояткорро баррасӣ намуданд. Роҳбари Агентӣ дар ҷараёни сафари хидматӣ бо роҳбарони ҷамоаҳои Тоҷикистон воқеъ дар ҳудуди вилояти Свердловск низ мулоқот анҷом дод, ки зимни он таҷрибаи мусбати ҳамкорӣ бо мақомоти ҳифзи ҳуқуқи минтақа мавриди муҳокима қарор гирифта, дурнамои ҳамкории минбаъда ҳам дар сатҳи минтақавӣ ва ҳам дар сатҳи байнидавлатӣ муайян карда шуд.