Се нишони варзишгарони тоҷик аз Остона

Душанбе, 18 декабр. (АМИТ «Ховар», Ситора Раҷабова).- Се варзишгари тоҷик дар мусобиқаи байналмилалӣ оид ба варзиши якҳарбаи шарқӣ- киёкушинкай, ки аз 14-ум то 16-уми декабри соли равон дар шаҳри Остонаи Қазоқистон баргузор гардид, се нишон ба даст оварданд. Дар ин мусобиқаи бонуфуз пас аз мағлуб кардани рақибонаш Шерзоди Саъдулло дар вазни то 40 кг ба гирифтани медали тилло мушарраф шуд. Ибоди Ҷалол соҳиби медали нуқра гардид. Ӯ дар қувваозмоиҳо дар вазни 50 кг баромад кард. Варзишгари дигари тоҷик Сайдаҳмад Раҳмонов дар вазни то 70 кг барандаи медали биринҷӣ шуд. Ёдовар мешавем, ки дар ин мусобиқаи бонуфуз аз намуди киёкушинкай зиёда аз 500 варзишгар аз кишварҳои гуногун иштирок намуданд.