Сирки Лаҳистон ба Душанбе меояд

Душанбе, 4 декабр. (АМИТ «Ховар», Екатерина Пасторова).- Назар ба хабари директори Сирки давлатии Тоҷикистон Ҷамолиддин Муҷиддинов, моҳи феврали соли 2014 Сирки филҳои Лаҳистон ба шаҳри Душанбе меояд. Мувофиқи суханони мавсуф, сафари сирки Лаҳистон дар натиҷаи соли 2010 дар Қазоқистон ба имзо расидани «Ёддошт дар бораи барқарор намудани равобити дӯстона, ҳамкорӣ ва танзими фаъолият дар бахши рушди байналмилалии санъати сирк» имконпазир гардид.Ҳуҷҷати мазкурро намояндагони Қазоқистон, Қирғизистон, Русия, Ӯзбекистон, Лаҳистон, Украина, Ҷопон ва Тоҷикистон имзо карда буданд. «Яке аз принсипҳои ёддошти мазкур иборат аз ташкили сафарҳои ҳунарии сиркҳои кишварҳои имзонамудаи ин ҳуҷҷат мебошад», — гуфт директори Сирки давлатии Тоҷикистон.