Таҳқиқоти илмии АИКТ дар соли равон

Душанбе, 24 декабр, (АМИТ «Ховар», Ситора Раҷабова).- Академияи илмҳои кишоварзии Тоҷикистон дар соли равон таҳқиқоти илмиро бо назардошти вазифаҳое, ки аз маҷлиси васеи Ҳукумати Ҷумҳурии Тоҷикистон ва барномаҳои давлатӣ дар соҳаи кишоварзӣ бармеоянд, иҷро намуд.Дар соли равон фаъолияти муассисаҳои илмии Академия аз ҷониби шуъбаи кишоварзӣ ва истифодаи замини дастгоҳи иҷроияи Президенти Ҷумҳурии Тоҷикистон, Вазорати кишоварзӣ, Вазорати рушди иқтисод ва савдо ва Палатаи ҳисоби Тоҷикистон мавриди омӯзиш қарор гирифта, барои беҳтар намудани самаранокии таҳқиқот, татбиқи натиҷаи онҳо дар истеҳсолот, тарбияи қадрҳои илмӣ ва ҳамкориҳои байналмилаӣ вазифаҳои муҳимро муайян карданд.Тавре ки дар ин бора аз Академияи илмҳои кишоварзии Тоҷикистон хабар доданд, аз ҷониби олимони Институти ветеринарӣ бори аввал омӯзиши касалии салмонеллёзи чорвои хурди шохдор ба роҳ монда шуд.Ҳамчунин ду барномаи ҷумҳуриявӣ оид ба пешгирӣ ва мубориза бар зидди бемории брутселлёзи ҳайвонот таҳия шуда, аз ҷониби Хадамоти назорати давлатии байторӣ тасдиқ гардид.