Таҳлилу омӯзиши хавфу хатари геологӣ

Душанбе, 17 декабр. (АМИТ «Ховар», Кристина Эрлих).- Ташкилоти Кӯмаки башардӯстона марҳалаи дуюми лоиҳаи «Беҳдошти нерӯи таҳлилу омӯзиши хавфу хатарҳои дурдасти геологӣ» — ро анҷом дод. Лоиҳаи мазкур бо дастгирии молиявии Агентии рушду ҳамкории Швейтсария ва Раёсати оид ба рушди байналмилалии Британияи Кабир дар амал татбиқ шуд. Дар ин бора намояндаи бахши равобит бо аҳли ҷамъияти ташкилоти Кӯмаки башардӯстона дар Тоҷикистон Хосият Ҳамидхонова ба АМИТ «Ховар» хабар дод.Лоиҳа зимни ҳамкорӣ бо созмони Welthungerhilfe (Велсунгерҳилф) ва Ҳукумати Тоҷикистон роҳандозӣ шудааст. Мақсади асосии лоиҳа иборат аз омӯзиши хавфу хатарҳои геологӣ ва таъсири онҳо ба ҷамоаҳои маҳаллии сокини минтақаи хавфу хатар, ҳамчунин тақвияти устувории 50 ҷамоаи Вилояти Мухтори Кӯҳистони Бадахшон, водии Зарафшон ва ноҳияи Ҷиргатол буд. Аз ин лоиҳа 55 ҳазор нафар мустақиман бархӯрдор шуданд.Ибтикорот ва натиҷаҳои лоиҳа дар конфронсҳои байналмилалӣ ва семинарҳои минтақавию миллӣ мавриди муҳокима қарор гирифтанд. Лоиҳа фаъолияташро зимни ҳамкории зич бо Сарраёсати геологияи назди Ҳукумати ҶТ, Кумитаи ҳолатҳои фавқулодда ва мудофиаи шаҳрвандӣ, Муассисаи давлатии ҳавосанҷии назди Ҳукумати ҶТ анҷом дод.