Тааруфаҳои нави об барои сокинони пойтахт

Душанбе, 25 декабр. (АМИТ «Ховар», Кристина Эрлих).- Корхонаи воҳиди давлатии «Обу корези Душанбе» аз 1 январи соли 2014 барои истифодаи оби нӯшокӣ тааруфаҳои навро, ки Хадамоти зиддиинҳисории назди Ҳукумати Ҷумҳурии Тоҷикистон тасдиқ намудааст, роҳандозӣ мекунад. Дар ин бора котиби матбуоти шаҳри Душанбе Шавкат Саидов ба мухбири АМИТ «Ховар» хабар дод. Мувофиқи суханони Шавкат Саидов, ташкилотҳои буҷетии пойтахт дар асоси тааруфаҳои наве ки онҳоро Хадамоти зиддиинҳисории назди Ҳукумати Ҷумҳурии Тоҷикистон тасдиқ кардааст, барои як метри мукааб оби нӯшокӣ ва партофти ифлосиҳо (бо назардошти андози арзиши изофӣ) ба ҷойи 1 сомонию 00,4 дирам 1 сомонию 36, 88 дирам мепардозанд. Ташкилотҳои ғайрибуҷавии шаҳр барои як метри мукааб об (бо назардошти андози арзиши изофӣ) ба ҷойи 2 сомонию 71 дирам 3 сомонию 3,99 дирам пардохт мекунанд. Сокинони хонаҳои дорои ҳисобкунанкҳои оби пойтахт барои як метри мукааб об ба ҷойи 32 дирами пештара 41,61 дирам пардохт менамоянд. Ғайр аз ин, сокинони биноҳои то 12 ошёна, ки дар онҳо ҳисобкунакҳои об насб нашудаанд, ҳар моҳ ба ҷойи 3 сомонию 50 дирам 4 сомонию 54,654 дирам, сокинони биноҳои аз 12 ошёна баландтар ба ҷойи 4 сомонию 38 дирам 5 сомонию 69,586 дирам ва сокинони хобгоҳҳо ба ҷойи 2 сомонию 90 дирам 3 сомонию 77 дирам пардохт мекунанд.