Вазорати маориф ба омӯзгорон кӯмак намуд

Душанбе, 10 декабр. (АМИТ «Ховар», Зарангези Латиф).- Имрўз бо ташаббуси Вазорати маориф ва илми Ҷумҳурии Тоҷикистон муассисаҳои таҳсилоти олии касбии кишвар ба омўзгороне, ки дар шаҳри Ваҳдат аз заминларза зарар дидаанд, кӯмаки хайрия расониданд. Тавре ки Маҳмудхон Шоев, сухангӯи Вазорати маориф ва илми ҷумҳурӣ иттилоъ дод, ба омўзгорони зарардида 17 тонна маҳсулоти кишоварзӣ, аз қабили пиёз, картошка, сабзӣ, орд, шакар, биринҷ, равған ва чой дастрас карда шуд. Хуршед Зиёев, ректори Донишкадаи давлатии забонҳои Тоҷикистон ба номи Сотим Улуғзода иброз дошт, ки муроҷиати Вазорати маориф ва илм аҳли кормандони муассисаҳои таҳсилоти олии кишварро бетараф нагузошт ва баҳри дастгирии зарардидагони заминларзаи шаҳри Ваҳдат ба омўзгорони муассисаҳои таҳсилоти умумии шаҳр як миқдор маводи хўрокӣ ҳамчун кӯмак дастрас карда шуд.