Вилояти Новосибирск хоҳони ҳамкорӣ бо АМНМ аст

Душанбе, 16 декабр. (АМИТ «Ховар», Лутфия Эшонқулова).- Рӯзи шанбеи гузашта директори Агентии назорати маводи нашъаовари назди Президенти ҶТ Рустам Назаров ва муовини ҳокими вилояти Новосибирск Кирилл Колончин масоили ҳамкории дуҷонибаро мавриди муҳокима қарор доданд. Назар ба хабари маркази матбуоти Агентии назорати маводи нашъаовар, мақсади асосии сафари роҳбари агентӣ ба вилояти Новосибирск иборат аз густариши ҳамкории хадамот бо Раёсати минтақавии мақомоти вилоят мебошад. Дар ҷараёни боздид аз вилояти Новосибирск масоили коҳиш додани ҷинояткориҳои шаҳрвандони ҶТ, ҳамчунин барқарор намудани равобит барои фаъолияти минбаъда аст.Кирилл Колончин дар навбати худ зикр намуд, ки вилояти Новосибирск ҷонибдори ҳамкорӣ бо Агентии назорати маводи нашъаовари Тоҷикистон аст.Имрӯз сафари хидматии ҳайати Агентии назорати маводи нашъаовари ҶТ ба шаҳрҳои Федератсияи Русия анҷом меёбад. Дар анҷоми сафар ҳайати Агентӣ бо роҳбарии директори он Р.Назаров бо роҳбарони кишвари Красноярск мулоқот анҷом медиҳад.