Қурби доллари ИМА тағйир наёфт

Душанбе, 3 январ. (АМИТ«Ховар», Лайло Қосимова). -Дар нуқтаҳои мубодилаи асъори ҷумҳурӣ ҳафтаи ҷорӣ қурби доллари ИМА чун ҳафтаи пешин бе тағйир боқӣ монда, ба ҳисоби миёна дар ҳудуди 4,9220-4,9380 сомонӣ қарор гирифт.  Вале дар рӯзҳои соли нав қурбҳои миёнаи амалиёт бо рубли русӣ ва евро каме паст шуда, мувофиқан ба 0,1478-0,1488 сомонӣ ва ба 6,5300-6,6670 сомонӣ баробар шуданд. Тавре ки аз хадамоти матбуоти Бонки миллии Тоҷикистон хабар доданд, 2 январ, дар ибтидои соли 2014 қурби миёнаи доллари ИМА дар нуқтаҳои мубодилаи асъори шаҳри Душанбе 4,9240-4,9370 сомонӣ, шаҳри Хуҷанд 4,9250-4,9350 сомонӣ ва шаҳри Қурғонтеппа 4,9200-4,9400 сомониро ташкил намуд.