Ҳадафи Шўро-татбиқи ғояҳои ваҳдатсоз

Душанбе, 23 январ.(АМИТ «Ховар»,Фарзона Достонзода).- Имрўз ҷаласаи муштараки Кумитаи иҷроияи Ҳаракати ваҳдати миллӣ ва эҳёи Тоҷикистон ва Шўрои куҳансолони он баргузор шуд.Аз Кумитаи иҷроияи Ҳаракати ваҳдати миллӣ ба АМИТ «Ховар» иттилоъ доданд, ки дар ҷаласа раиси кумитаи иҷроияи ҳаракат Мирзошоҳрух Асрорӣ оид ба самтҳои асосии фаъолияти ин ташкилот ва нақши шўроҳои минтақавии ҳаракат ҷиҳати таҳкими ваҳдату якпорчагии кишвар, сулҳу субот, дўстию рафоқат миёни намояндагони халқияту миллатҳои гуногуни Тоҷикистон, татбиқи дастуру супоришҳо ва ғояҳои ваҳдатсози Президенти кишвар, раиси Шўрои марказии ҳаракат муҳтарам Эмомалӣ Раҳмон маърўза кард. Баъдан раиси Шўрои куҳансолони ҳаракат Ғайбулло Афзалов нуктаҳои муҳими нақшаи фаъолияти Шўрои куҳансолонро шарҳ дода, зикр намуд, ки барои пешбурди самарабахши корҳо аз ҳисоби аъзои Шўро панҷ бахш созмон дода мешавад, ки онҳо фаъолияти худро дар самтҳои иқтисоду сиёсат, ҳуқуқу илму маориф, ҷавонону занон роҳандозӣ мекунанд. Аъзои Шўро баъди пешниҳоду таклифҳо нақшаи фаъолиятро барои нимсолаи аввал такмил дода, онро қабул карданд.