Ҷоизадорон номбар шуданд

Душанбе, 6 январ. (АМИТ «Ховар»).- Федератсияи футболи шаҳри Душанбе дар маросими вохӯрӣ бо кормандони фаъоли шаҳр натиҷаи солро ҷамъбаст карда, ҷоизадорони мавсими гузаштаро номбар намуд. Ҳамлагари дастаи «Султони Кабир» Далер Наимов унвони бозингари беҳтарини пойтахт дар соли 2013 – ро ба даст овард. Раиси Федератсияи футболи шаҳри Душанбе Дилшод Ҷӯраев дар бораи кори дар соли 2013 иҷрошуда ва дурнамои мавсими оянда гузориш дод. Аз ҷумла, зикр гардид, ки Федератсияи футболи пойтахт дар мавсими гузашта барои рушди футболи бачагона ва оммавӣ, футболи хурд, футболи донишҷӯён ва мусобиқоти дигар саъю кӯшиши зиёдеро ба харҷ дод.Роҳбари дастаи «Султони Кабир» Давлат Саидов мураббии беҳтарин дар шаҳри Душанбе, Ҳикмат Фузайлов аз Академияи «Истиқлол» довари беҳтарин дониста шуда, мураббии дастаи «Энергетик» Одил Каримов бо мукофоти «Барои саҳм ба рушди футболи бачагона» сарфароз шуд. Бозингари дастаи мунтахаби Тоҷикистон ва дастаи «Бонки миллӣ» Шерзод Ҷумъаев унвони беҳтарин бозингари футзали шаҳри Душанберо ба даст овард. Собиқ ҳамлагари дастаи мунтахаби миллии Тоҷикистон Холмурод Зардов сазовори довари сол дар пойтахт гардид.