15% донишҷӯёни ДДС тариқи квотаи президентӣ таҳсил менамоянд

       Душанбе, 29 январ (АМИТ «Ховар», Анна Мощенко).- Дирӯз, ректори Донишкадаи давлатии санъати ба номи М.Турсунзода Диловар Латипов дар нишасти матбуотӣ қайд намуд, ки алҳол дар донишкада 1768 донишҷӯ, аз ҷумла 826 донишҷӯ дар асоси буҷавӣ ва 942 нафар дар асоси шартномавӣ таҳсил мекунанд.
  Ба иттилои ректори донишкада дар соли 2013 беш аз 3 ҳазор донишҷӯ донишкадаро хатм намуд. Дар донишкада 121 донишҷӯ тариқи квотаи президентӣ таҳсил менамояд, ки беш аз 15% шумораи умумии шогирдонро ташкил медиҳад. Айни замон, дар курси якуми магистратура 7 донишҷӯ аз Афғонистон таҳсили илм мекунанд. 
  «Соли 2013 созишнома дар бораи ҳамкорӣ бо Академияи давлатии фарҳанг ва санъати  Челябинск бо иштироки ректори он Владимир Рушанин имзо гардид. Имзои чунин созишнома бо Донишгоҳи давлатии  фарҳанг ва санъати Белоруссия низ дар назар аст », — гуфт  Д.Латипов. 
  Зикр шуд, ки бо мақсади таълиму тарбия дар соли 2013 беш аз 100 чорабинии фарҳангию иттилоотӣ ва конфронсҳои  илмӣ-амалӣ ва илмӣ-назариявӣ ,симпозиумҳои байналмилалӣ , семинарҳои илмӣ доир гардиданд.