500 кг маводи нашъаовар куҷо шуд?

Душанбе, 24 январ. (АМИТ «Ховар», Лайло Қосимова).- 24 январ дар Агентии назорати маводи нашъаовари назди Президенти Ҷумҳурии Тоҷикистон дар ҳузури комиссия аз ҳисоби намояндагони мақомоти ҳифзи ҳуқуқ, суд ва воситаҳои ахбори омма маводи нашъаовар аз рӯи 3 парвандаи ҷиноие, ки нисбат ба онҳо мақомоти судӣ ҳукм баровардаанд, сӯзонида шуданд. Дар оташдони махсуси агентӣ зиёда аз 144 килограмм маводи нашъаовар, аз ҷумла, 43 килограмму 598 грамм героин, 3 килограмму 400 грамм афюн ва 97 килограмму 360 грамм маводи нашъаовари гурӯҳи бангдона нест карда шуд. Тавре ки аз хадамоти матбуоти агентӣ хабар доданд, маводи нашъаовари мазкур аз тарафи кормандони агентӣ дар ҷараёни гузаронидани чорабиниҳои фаврию ҷустуҷӯӣ мусодира гардид. Тибқи иттилои агентӣ соли 2013 ҳамагӣ 2 маротиба ба миқдори умумии қариб 500 килограмм маводи нашъаовар аз тариқи сӯзонидан нобуд карда шуд.