Лату кӯб ва ғорати ошкорои сокини пойтахт

Душанбе, 14 январ (АМИТ «Ховар», Фарзона Ашӯрмадова).- Бино ба муроҷиати шаҳрванд Муҳаммадзевар ба ШКД дар ноҳияи Фирдавсии пойтахт ӯро шахси номаълум дар маҳаллаи 64-уми шаҳри Душанбе, бе ягон асос лату кӯб намуда, бо роҳи ошкоро аз дасташ телефони мобилии тамғаи «Nokia», ки арзишаш 200 доллари амрикоӣ будааст ва маблағи пулӣ дар ҳаҷми 700 доллари амрикоиашро гирифта, аз ҷойи ҳодиса ғайб задааст. Сомонаи ВКД хабар медиҳад, ки зимни гузаронидани чораҳои фаврӣ-ҷустуҷӯӣ аз ҷониби кормандони милитсия бо гумони ғоратгарӣ шаҳрванд Наврӯз Назаров, соли таваллудаш 1990, сокини ш.Ваҳдат дастгир шуд. Нисбат ба далели мазкур парвандаи ҷиноӣ оғоз гардида, тафтишот идома дорад.