«Моҳи Хатлон» — китоби нави дипломати тоҷик дар Ҳиндустон

Душанбе, 9 январ. (АМИТ «Ховар», Ф. Достонзода).-Китоби тозанашри шоири хушсалиқа Саидбег Саидӣ таҳти унвони «Моҳи Хатлон» аз чоп баромад.Дар маҷмӯаи нави ашъори ин шоир аз меҳри беандоза нисбат ба Ватан, обу хоки диёр, нигаҳдошти мероси аҷдодӣ ва ищқи поки беолоиш сухан меравад.Ёдовар мешавем, ки Саидбег Саидӣ (Саидов Саидбек Бойхонович) солҳои 2002 — 2003 дар вазифаи мушовири калони Президенти Ҷумҳурии Тоҷикистон оид ба сиёсати хориҷӣ ва солҳои 2003 — 2006 мудири шуъбаи робита бо кишварҳои хориҷии дастгоҳи иҷроияи Президенти Ҷумҳурии Тоҷикистон фаъолият намудааст. Солҳои 2006 — 2008 Сафири Тоҷикистон дар Покистон буд ва аз соли 2008 то имрӯз Сафорати Тоҷикистон дар Ҳиндустонро роҳбарӣ мекунад. То ин муддат ду маҷмӯаи шеърҳояш — «Накҳати Кашмир» («Адиб», 2010) ва «Замзамаҳои Ҳиндустон» (Адиб, 2012) нашр шудаанд.