Муҳокимаи масоили сарҳадот

Душанбе, 8 январ. (АМИТ «Ховар»).- 7  январ  дар  шаҳри  Душанбе  мулоқоти  ҳайатҳои  роҳбарони  Комиссияҳои  байниҳукуматӣ  оид ба  муайян  кардани  маҳаллу  мавқеияти  сарҳади  давлатии  Тоҷикистону  Қирғизистон  бо   роҳбарии  муовини   Сарвазири  Тоҷикистон  Муродалӣ  Алимардон  ва ноиби  Сарвазири  Қирғизистон  Токон Мамитов  баргузор  гардид. 
 
Тавре  ки  аз  Вазорати  корҳои  хориҷии  Ҷумҳурии  Тоҷикистон  хабар  доданд,  дар  ҷараёни  мулоқот  масоили  муайян  кардани  маҳаллу  мавқеияти   сарҳади давлатӣ  мавриди  муҳокима  қарор  гирифта ва  ҷадвали   мулоқоти  ҳайатҳои  ҳукуматӣ  ва  гуруҳҳои  корӣ  барои  соли  2014  муайян  гардид. 
 
Яке  аз  мавзуҳои  асосии   мулоқот  иборат  аз  муҳокимаи   ҳамкории  байнисарҳадии  миёни  вилоятҳои  Суғд ва Боткент буд. 
 
Ба  хадамоти  сарҳадӣ, мақомоти   корҳои  дохилӣ ва  маъмуриятҳои  вилоятҳои  Суғду  Боткент  супориш  дода шуд, ки  барои  ташкили  гуруҳҳои  муштараки  муҳофизати  сарҳад ба  манзури  таъмини  амнияти  ҷамъиятӣ,  ҳаракати  озоди  шаҳрвандон  ва  воситаҳои  нақлиётии  ҷонибҳо дар  ҳудуди  сарҳадот  9  январи  соли  ҷорӣ  дар  шаҳри  Исфара  вохурии  кориро  роҳандозӣ  намоянд. 
 
Ҷонибҳо тасмим  гирифтанд, ки  чунин   мулоқотҳоро  мунтазам   рӯи  кор  оранд. Онҳо  изҳори   боварии  қатъӣ  намуданд, ки  ҳамкории  ҳар  ду  кишвар  дар  масоили  сарҳад  минбаъд  ҳам   дар  руҳи  дӯстии  анъанавӣ  ва  некиҳамсоягӣ  сурат  хоҳад  гирифт.