Мулоқот бо адибон дар таътили зимистона

Ҳамадонӣ, 25 январ. (АМИТ «Ховар», С. Холов).- Шуъбаи маориф ва мактаби варзишии ноҳияи Ҳамадонӣ барои ҷолиб гузаронидани таътили зимистонаи мактаббачагон маҷмӯи чорабиниҳои фарҳангию фароғатӣ, таълимӣ ва варзиширо тарҳрезӣ намуда, даври аввали чорабиниҳоро шуруъ карданд. Ба иттилои мудири шуъбаи маорифи ноҳия Алишер Исоев озмунҳои гуногуни ноҳиявӣ байни мактаббачагон идома дошта, дар кулли мактабҳо машғулиятҳои иловагӣ ҷараён доранд. Бештар мактаббачагон аз фанҳои дақиқ машғулият мегузаронанд ва хонандагони болаёқат ба олимпиадаҳои ҷумҳуриявӣ ва байналхалқӣ омодагӣ мегиранд. Шуъбаи маорифи ноҳия мувофиқи нақша як зумра шоирону нависандагони маъруфи тоҷикро даъват намудааст, ки дар давоми як моҳ бо мактаббачагон вохӯрӣ гузаронанд.