Мусодираи зиёда аз 10 кг маводи нашъадор

Душанбе, 3 январ. (АМИТ «Ховар», Лутфия Эшонқулова).-Аз ҷониби кормандони ШВКД дар шаҳри Сарбанд, дар назди терминали мусофиркашонии ноҳияи Фархор шаҳрванд Умедҷон Мирзоев, соли таваллудаш 1985, сокини шаҳри Душанбе ҳамчун гумонбар дар ғайриқонунӣ нигоҳ доштани маводи нашъадор дастгир шуд. Ҳангоми кофтукови шахсӣ аз ӯ 5 кг 851 грамм маводи нашъадори ҳашиш дарёфт ва мусодира шуд.Тавре ки сомонаи расмии ВКД хабар медиҳад, ҳамчунин, зимни гузаронидани чорабиниҳои фаврию ҷустуҷӯӣ кормандони қисми минтақавии РВКД дар вилояти Хатлон оид ба гуруҳи ноҳияҳои Кӯлоб, аз хонаи истиқоматии шаҳрванд Абдулвоҳид Раҳимов , соли таваллудаш 1979, сокини шаҳри Кӯлоб 5 кг 15 грамм маводи нашъадори бангдона дарёфт ва мусодира намуданд. Муайян карда шуд, ки маводи нашъадори мазкур ба шаҳрванд Фарҳод Раҳимови 27-сола, истиқоматкунандаи ҳамон ҷо тааллуқ доштааст.Нисбати далелҳои мазкур бо моддаи 200 қисми 4 Кодекси ҷиноии Ҷумҳурии Тоҷикистон парвандаи ҷиноӣ оғоз шуда, тафтиши пешакӣ идома дорад.