Н. Мансуров: «Судяҳои суди иқтисодӣ ҷиноят содир накарданд»

Душанбе, 2 3 январ. (АМИТ «Ховар», Муқаддас Кушакова)- «Дар давраи ҳисоботӣ аз ҷониби марҳилаҳои судии Суди Олии иқтисодии Ҷумҳурии Тоҷикистон 454 парванда ва 298 арзу шикоят баррасӣ гардид»,-иброз дошт Наим Мансуров, раиси Суди Олии иқтисодии Ҷумҳурии Тоҷикистон зимни нишасти матбуотӣ ба хабарнигорон. Вай ҳамчунин изҳор дошт, ки маблағи умумии даъвоҳо аз рӯи парвандаҳои ҳалшуда 59 миллиону 647 ҳазору 346 сомониро ташкил медиҳад. Аз маблағи даъвоҳои қаноатшуда ба мақомоти давлатӣ 19 миллиону 38 ҳазору 694 сомонӣ гузаронида шуд. Аз рӯи аризаҳои даъвогӣ, шикоятҳои кассатсионӣ ва назорати боҷи давлатӣ ба фоидаи буҷети давлат маблағи 1 миллиону 345 ҳазору 575 сомонӣ супорида шудааст. Дар посух ба саволи хабарнигори АМИТ «Ховар» раиси Суди Олии иқтисодӣ гуфт, ки: «Соли сипаригардида аз ҷониби кормандони судҳои иқтисодӣ ягон ҷинояти коррупсионӣ ва дигар ҷиноятҳо ба қайд гирифта нашудааст. Онҳо баръакс кӯшиш менамоянд, ки пеши роҳи ҳама гуна ҷиноятҳоро гиранд».