Ошкор намудани 1325 ҷинояти коррупсионӣ

Душанбе, 31.01.2014. (АМИТ «Ховар», Лутфия Эшонқулова).-Аз ҷониби воҳидҳои ҳифзи ҳуқуқи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар соли сипаригардида 1325  адад ҷинояти коррупсионӣ, иқтисодии хусусияти коррупсионидошта ва ба андоз алоқаманд ошкор карда шуд. 
Тавре ки маркази матбуоти агентии мазкур хабар медиҳад, аз шумораи умумии ҷиноятҳои ошкоргардида 302 -тои онҳоро ҷиноятҳои вазнин ва махсусан вазнин ташкил медиҳанд.   
Кормандони агентӣ дар ин давра 941 ҳолати  ҳуқуқвайронкуниҳои маъмурии ба коррупсия алоқамандро ошкор карданд. Дар натиҷа ба маблағи умумии 774 ҳазору 940 сомонӣ ҷарима татбиқ шуда, аз ин маблағ то давраи ҳисоботӣ 734 ҳазору 660 сомонии он рӯёнида шуд.  Ҳамчунин агентӣ ҷиҳати пешгирии ҳуқуқвайронкуниҳои коррупсионӣ, ба роҳбарони вазорату идораҳо, корхона ва муассисаҳои дахлдор оид ба бартараф намудани сабабу шароитҳои ба коррупсия мусоидаткунанда 833 пешниҳод фиристода, ба шахсони мансабдор 4003 дастури хаттӣ, аз ҷумла 19  дастур оид ба хизмати якҷояи хешовандони наздик дода шуд.   Дар натиҷаи баррасии ин санадҳои эътиноии агентӣ 1950 нафар шахсони гунаҳгор ба ҷавобгарии интизомӣ кашида шуда, 116 нафари онҳо аз вазифаҳои ишғолнамудаашон озод шуданд.