Рушди шоҳмот дар Шуғнон

Шуғнон, 11 январ. (АМИТ «Ховар», Файз Мирасан).- Дар мактаби варзишии ноҳияи Шуғнон ба ёдбуди шоҳмотбози маъруфи вилоят Карамшо Маъсумов мусобиқаи варзишӣ баргузор шуд. Карамшо Маъсумов аз истеъдодҳои барҷастаи риштаи шоҳмот дар миқёси вилоят ва ҷумҳурӣ буда, ҳамчун симои шинохтаи ин намуди варзиш эътироф шудааст. Вай на фақат дар мусобиқоти ҷумҳуриявӣ ба дастовардҳои шоиста ноил гардидааст, балки шарафи вилоят ва ҷумҳуриро дар мусобиқаҳои собиқ ҷамоҳири шӯравӣ муваффақона ҳимоя кардааст. Дар ин мусобиқа дар баробари шоҳмотбозони наврас, ҷавонони деҳоти атроф низ ширкат варзиданд. Устоди варзиши чумҳурӣ Олуча Ҷумъаев- мураббии мактаби варзишӣ изҳор дошт, ки мусобиқаҳо на танҳо ба сайқал додани маҳорати варзишии иштирокдорони он кумак мекунанд, балки насли наврас ва ҷавонро дар руҳияи ватандустӣ ва шавқу рағбат ба варзиш тарбия менамоянд. Бо дастгирии ширкати барқи «Помирэнерҷи» ба роҳ мондани дарсҳои шоҳмот дар мактабҳои таҳсилоти ҳамагонӣ шавқу рағбати кӯдакону наврасонро ба ин намуди варзиш боз ҳам зиёд намуд. Бандалӣ Абдуалиев-муовини сарвари мактаби варзиши ноҳияи Шуғнон аз дастовардҳои варзишгарони ноҳия дар солҳои охир ёдовар шуда, гуфт, ки дар соли 2013 шоҳмотбозони мактаби варзишӣ танҳо дар мусобиқаҳои ҷумҳуриявӣ 11 медалро соҳиб гардиданд.