Семинари ҷумҳуриявии осорхонаҳои мактабӣ

Душанбе, 10 декабр. (АМИТ «Ховар», Раъно Нусратуллоева).- Дирӯз дар Осорхонаи маорифи Академияи таҳсилоти Тоҷикистон дар мавзӯи «Вазъият ва мушкилот» семинари ҷумҳуриявии осорхонаҳои мактабӣ баргузор гардид. Семинарро президенти Академияи таҳсилоти Тоҷикистон Ирина Каримова ифтитоҳ намуд.Дар семинар маърӯзаи мудири Осорхонаи маориф Саодат Фатҳуллоева дар мавзӯи «Нақши осорхонаи маориф дар таъсиси осорхонаи мактабӣ» шунида шуд. Инчунин дар мавзӯи «Худфаъолиятии мактаббачагон дар кори осорхона» маърӯзаи Майрамбӣ Қурбонова, муовини директори Маркази таҳсилоти иловагии Вазорати маорифи ҷумҳурӣ, маърӯзаи Адолат Назарова мудири осорхонаи мактаби №82 ноҳияи Сино — дар мавзӯи «Нақши осорхонаи мактабӣ дар тарбияи насли наврас», маърӯзаи Зебуниссо Қудбиддинова, мудири осорхонаи мактаби №54 н.Сино- дар мавзӯи «Истифодаи нигораҳои осорхона дар раванди таълим», Мунаввара Ҳомидова мудири осорхонаи мактаби №6 ноҳияи Ҳисор дар мавзӯи «Меъёрҳои нави ҷо ба ҷогузории нигораҳо дар осорхона», маърӯзаи Қурбоналӣ Гадоев, ходими илмии Осорхонаи маорифи Академияи таҳсилоти Тоҷикитстон дар мавзӯи «Вазъи осорхонаҳои мактабӣ дар ноҳияҳо ва роҳҳои такмили он» шунида шуда, нисбат ба маърӯзаҳои иштирокчиёни семинар аз ноҳияҳои Тоҷикобод, Нуробод, Абдураҳмони Ҷомӣ, Ҷалолиддини Румӣ, Конибодом, Файзобод, Қумсангир, Восеъ фикру андешаашонро баён намудаанд.Мақсади семинари осорхонаҳои мактабӣ дар он аст, ки осорхонаҳои мактабӣ аз фаъолият бозмонда истодаанд, чунки осорхонаҳои мактабӣ на аз ҳисоби шуъбаи марифи ноҳия ва на аз ҳисоби ҳокимияти маҳаллӣ маблағгузорӣ намешаванд.Он нигораю амсилаҳое, ки аз таърихи гузаштаи чандин ҳазор солаи бойи мо дарак медиҳанд, ҷои асосии худро намеёбанд. Яъне, барои онҳо шароити мусоид фароҳам оварда нашудааст.