Супориши Э. Раҳмон ба таъмини аҳолӣ бо неруи барқ

Душанбе, 16 январ. (АМИТ «Ховар Муқаддас Кушакова).- Дар ҷараёни маҷлиси Ҳукумати Ҷумҳурии Тоҷикистон Президенти мамлакат Эмомалӣ Раҳмон зикр намуд, ки ҷиҳати ҳарчи беҳтар таъмин намудани эҳтиёҷоти аҳолӣ бо неруи барқ дар соли 2013 тибқи нақша 8 неругоҳи хурди барқи обӣ бунёд карда шуд ва имрӯз дар маҷмӯъ шумораи онҳо ба 310 расид. «Вале бояд гуфт, ки тибқи маълумот 108 неругоҳи зикршуда мавсимӣ мебошад ё умуман фаъолият намекунад. Дар баробари ин, соли гузашта талафоти неруи барқ 2,5 миллиард киловатт — соатро ташкил додааст, ки дар муқоиса бо соли 2012-ум 92 миллион киловатт — соат зиёд мебошад», — изҳори нигаронӣ намуд Сарвари давлат.Бо назардошти ин, Эмомалӣ Раҳмон тазаккур дод, ки Вазорати энергетика ва захираҳои об ва Ширкати «Барқи Тоҷик»-ро зарур аст, ки камбудиву норасоиҳои ҷойдоштаро ҳарчи зудтар бартараф намуда, ҷиҳати таъмини талаботи иқтисоди миллӣ ва сокинони кишвар бо неруи барқ тадбирҳои иловагиро амалӣ намоянд.