Таҷҳизоти варзишӣ ба клуби «Муҳорибаи тан ба тан»

Хоруғ, 2 январ. (АМИТ «Ховар», Файз Мирасан).- Дар арафаи соли нав клуби навтаъсиси «Муҳорибаи тан ба тан»-и шаҳри Хоруғ соҳиби таҷҳизоти варзишӣ гардид.   Клуби «Муҳорибаи тан ба тан» соли равон таъсис ёфта, гомҳои нахустинашро дар шоҳроҳи васеи варзиш мегузорад. Аз ин рӯ мақомоти маҳаллии ҳокимияти давлатии шаҳри Хоруғ ва ташкилотҳои байналмиллаливу ҷамъиятии мустақар дар маркази вилоят тасмим гирифтаанд ин клубро дастгирӣ намоянд. Ба намояндагӣ аз номи «Барномаи рушди манотиқи куҳистон» Перӯз Фидоев ба мураббии клуби «Муҳорибаи тан ба тан» Амран Мусиев таҷҳизоти варзишӣ туҳфа намуда, изҳори умедворӣ кард, ки дар оянда тарбиятгирандагони клуб номбардори шарафи варзишии на танҳо шаҳри Хоруғ, балки Тоҷикистон мегарданд. Ин намуди варзиш агарчи ҷавон бошад ҳам, наврасони зиёде ба он машғуланд. Мусобиқаи нахустин аз рӯи муҳорибаи тан ба тан бо дастгирии раёсати Агентии мубориза бо гардиши ғайриқонунии назди Президенти кишвар дар моҳи ноябр баргузор гардид, ки варзишгарони ҷавон аз худ маҳорату лаёқати хуб нишон доданд.