Татбиқи лоиҳаҳои инвеститсионӣ

Душанбе, 20 январ. (АМИТ «Ховар», Кристина Эрлих ).- Бо дастгирии Ҳукумати Ҷумҳурии Тоҷикистон дар бахши хоҷагии манзилию коммуналӣ ба манзури рушду беҳдошти системаҳои таъмини об ва санитария якчанд лоиҳаи инвеститсионӣ фаъолият дорад. Аз ҷумла, дар ҳошияҳои Лоиҳаи рушди инфрасохтори коммуналии маҳаллӣ корҳои сохтмонию барқарорсозии системаҳои таъмини оби шаҳрҳо ва марказҳои ноҳияҳои Ваҳдат, Рашт, Кулоб, Данғара, Қӯрғонтеппа, Истаравшан ва Конибодом ба маблағи 16 милдлиону 500 ҳазор доллари ИМА иҷро гардидаанд.Дар асоси лоиҳаи мазкур 41 адад техникаи махсус, 790 контейнер барои ҷамъоварӣ ва интиқоли ахлот, ҳамчунин либоси корӣ барои кормандони муассисаҳои зертобеъ харидорӣ шудааст.Директори Корхонаи воҳиди давлатии «Хоҷагии манзилию коммуналӣ» Алимурод Тағоймуродов дар нишасти матбуоти аз рӯи натиҷаи фаъолият дар соли 2013 дар ин бора хабар дод.