Тоҷикистон-самти туристии ояндадор

Душанбе, 18 январ. (АМИТ «Ховар»,Некрӯзи Муҳамадсодиқ) .- Моҳи марти соли 2013 аз ҷониби Форуми умумиҷаҳонии иқтисодӣ (Word Economic Form), ки ташкилоти бонуфузтарини ҷаҳонӣ оид ба таҳлил ва баҳогузории фаъолияти иқтисодии кишварҳо ба ҳисоб меравад, мавқеи Тоҷикистон дар самти турустӣ 4 зина баланд бардошта шуд. Ин нуқтаро зимни нишасти матбуотӣ 17 январ раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшоҳ Неъматов зикр намуд.Вай афзуд, ки коршиносони байналмилалӣ сиёсати пешгирифтаи 140 кишвари ҷаҳонро дар самти «Саёҳат ва туризм» мавриди таҳлили ҳамаҷониба қарор дода, Тоҷикистонро ҳамчун самти туристӣ ояндадор арзёбӣ кардаанд.Маврид ба ёдоварист, ки соли 2013 ба Тоҷикистон 320012 нафар шаҳрванди хориҷӣ ташриф овардааст, ки аз ин шумора 207911 нафарашон ба ҳайси турист арзёбӣ мегарданд.