Ғолиби «Ғунчаҳои умед» муайян шуд

Хоруғ, 24.02.2014. (АМИТ «Ховар», Файз Мирасан).-Мактаби санъати  бо номи Қурбоншо  Ноёбшоев  ғолиби озмуни вилоятии «Ғунчаҳои умед» дониста шуда, ҳайати эҷодии  ин мактаб  аз сӯи  шуъбаи фарҳанги вилоят  бо мукофот  қадрдонӣ гардид. 
      Тибқи нақшаи чорабинии шуъбаи фарҳанги вилоят  дарсҳои амалии  мактаби санъати шаҳри Хоруғ  аз тарафи шуъбаи фарҳанги вилоят мавриди санҷиш қарор гирифтанд.  Ба  думболи натиҷагирӣ аз  санҷиш мудири шуъбаи фарҳанги вилоят Муҳиддин Пайшанбе  оид ба  мавқеи назарраси  мактабҳои санъат дар тарбияи завқи бадеӣ  ва зебопарастии  истеъдодҳои наврас  сухан ронда,  изҳор дошт, ки  соли 2013 –ум барои  мактабҳои санъати вилоят  дар таълиму  тарбияи  кӯдакони ҳунарманд  бобарор буд.  
    Муҳиддин Пайшанбе  инчунин   изҳор дошт, ки мактаби санъат дар ояндаи наздик  ба  коллеҷи санъат табдил меёбад.