Ғолиби мусобиқа — тими «Дастгоҳи марказии ВКД»

Душанбе, 17 . 02. 2014. (АМИТ «Ховар», Лутфия Эшонзода).-Дар Маҷмааи варзишии Вазорати корҳои дохилӣ мусобиқаи кушоди даставӣ оид ба намуди футболи хурд байни мақомоти ҳифзи ҳуқуқ, сохторҳои қудратӣ ва корхонаву идораҳои давлатии Ҷумҳурии Тоҷикистон барои дарёфти «Ҷоми Вазири корҳои дохилӣ», ки аз 21 январи соли ҷорӣ идома дошт, ҷамъбаст гардид.
Дар мусобиқаи мазкур, 42 даста (16 даста аз 35-сола боло ва 26 даста то 35-сола) байни ҳам қувваозмоӣ намуда,  барои ба даст овардани ғолибият аз худ маҳорати баланди касбӣ нишон дода, дастаҳои пешсаф дар даври ниҳоӣ  барои гирифтани Ҷоми мусобиқа талош варзиданд.
Дастаи ширкати мобилии «Вавилон» дар байни футболбозони то  35-сола сазовори ҷойи якум гардида, ҷойи дуюм насиби дастаи Федератсияи Футболи Тоҷикистон, ҷойи сеюм насиби дастаи «Динамо»-и Вазорати корҳои дохилӣ гардид.
Миёни дастаҳои ғолиби мусобиқа оид ба футболи хурд байни футболбозони аз 35-сола боло ҷойи якум насиби дастаи «Дастгоҳи марказии Вазорати корҳои дохилӣ»; ҷойи дуюм насиби дастаи Федератсияи Футболи Тоҷикистон; ҷойи сеюм насиби дастаи «Фурудгоҳи байналмилалии Тоҷикистон» ва «Раёсати қӯшунҳои дохилии ВКД» гардид.