12 санади огоҳӣ ба муассисаҳои хизматрасонии ноҳияи И.Сомонӣ

Душанбе,  05.02.2014 (АМИТ «Ховар», Фарзона Ашӯрмадова).- Кумитаи забон ва истилоҳоти назди Ҳукумати Тоҷикистон дар нимсолаи дуюми соли 2013, 23 маркази хизматрасонии ноҳияи Исмоили Сомониро мавриди санҷиш қарор додаст, ки нисбат ба онҳо 12 санади огоҳкунанда тартиб дода шуд,- гуфт Гавҳар Шарофзода, раиси Кумитаи забон ва истилоҳоти Ҷумҳурии Тоҷикистон зимни нишасти матбуотӣ ба ВАО.
Ба иттилои мавсуф, гурӯҳи корӣ дар иртибот бо лавҳаву овезаҳо ва номгузории муассисаҳои савдо ва марказҳои хизматрасонӣ дар ҳамкорӣ бо Прокуратураи ноҳияи И. Сомонӣ вазъи иҷрои Қонуни ҷумҳурии Тоҷикистон «Дар бораи забони давлатии Тоҷикистон»-ро дар мақомоти иҷроияи маҳаллии ҳокимияти давлатии ноҳияи мазкур. қисми мустақили 3-юми ҳарбикунонидашудаи Хадамоти давлатии оташнишонӣ, Маркази назорати санитарию эпидемиологӣ ва шуъбаи маориф мавриди санҷиш қарор дода шуд.
Ҳамчунин дар айни замон дар асоси тавсияҳои гурӯҳи корӣ дар ноҳияи Исмоили Сомонӣ 4 муассисаи хизматрасонӣ бо забони тоҷикӣ баргардонида шуд, афзуд раиси Кумитаи забон ва истилоҳоти Тоҷикистон Гавҳар Шарофзода дар нишаст бо хабарнигорон.