Абдураҳим Холиқов – раиси ташкилоти “Адл ва инсоф”

Душанбе, 07-02-2014. (АМИТ “Ховар”).- Дирӯз дар Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон ҷаласа оид ба натиҷагирӣ аз  фаъолияти ташкилоти ибтидоии “Адл ва инсоф”-и  Ҳизби халқӣ-демократии Тоҷикистон (ҲХДТ)  баргузор гардид. Дар ин бора ба АМИТ “Ховар” сухунгӯи кумитаи мазкур Афшини Муқим хабар дод.
Ба иттилои манбаъ дар ин ҷаласа, ки бо ҳузури раиси  Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Абдураҳим Холиқов, намояндагони Кумитаи иҷроияи ҲХДТ дар ноҳияи Шоҳмансури шаҳри Душанбе ва аъзои ҳизб барпо гашт, фаъолияти яксолаи ташкилоти ибтидоии “Адл ва инсоф”-и Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон натиҷагирӣ ва дурнамои фаъолияти он дар соли 2014 муайян шуд.   
Ҳамчунин дар ин ҷаласа аъзои ҳизб Абдураҳим Холиқовро раиси ташкилоти ибтидоии “Адл ва инсоф” интихоб намуданд. 
Абдураҳим Холиқов аъзои ҳизбро ба садоқат ба халқу Ватан, Сарвари давлат ва пешбурди ҳадафҳои созандаи ҲХДТ даъват кард.