Афзоиши музди меҳнати миёна дар Тоҷикистон

Душанбе, 6.02.2014. (АМИТ «Ховар», Бекназари Абӯбакр). — Даромади пулии аҳолӣ дар соли 2013 тибқи баҳодиҳӣ 23,7 млрд. сомониро ташкил дода, нисбат ба соли гузашта 18 фоиз афзудааст. Ин нуктаро зимни нишасти матбуотӣ 6 феврал муовини ававли вазири рушди иқтисод ва савдо Неъматҷон Бӯриев зикр кард.
Ба иттилои номбурда дар ин давра музди меҳнати миёнаи ҳармоҳаи як корманд 708 сомониро ташкил дода, нисбат ба соли 2012-ум 27 фоиз афзудааст. Ба ҳисоби реалӣ афзоиши ин нишондиҳанда 21,5 фоизро ташкил дод.
Мавриди ёдоварист, ки соли 2013 сатҳи таваррум дар ҷумҳурӣ ба 3,7 фоиз баробар гардида, он аз ҳисоби болоравии индекси нархҳои маводи озуқаворӣ ба андозаи 3,2 фоиз, маҳсулоти ғайрихӯрокӣ 6,1 фоиз ва хизматрасониҳои пулакӣ ба аҳолӣ 0,8 фоиз ташаккул ёфтааст.