Амалиёти кормандони АНМН дар ноҳияи Панҷакент

Душанбе, 19.02.2014. (АМИТ «Ховар», Лутфия  Эшонзода).- Шабонарӯзҳои  гузашта кормандони  шуъбаи  Раёсати  Агентии  назорати  маводи  нашъаовари назди  Президенти  ҶТ  оид ба  гурӯҳи ноҳияҳои Зарафшони вилояти  Суғд  дар  ноҳияи  Панҷакент  амалиёти  сермарҳилавиро барои  дастгир  намудани  аъзои   гурӯҳи  ҷинояткор,  ки ба  паҳн  намудани  маводи нашъаовар  машғул буданд,  анҷом доданд.
 
Назар ба  хабари  Агентии  назорати  маводи  нашъаовар,  кормандони  агентӣ  бо  усули  «хариди  санҷишӣ»  аз сокини  45 — солаи  маҳаллӣ  миқдори  муайяни  маводи  нашъаоварро  пайдо  ва  худи  ӯро  дастгир  намуданд.  Ҳангоми  тафтишот  аз ҷайби номбурда  як  бастаи   маводи  нашъаовар пайдо  гардид. Шахси  дастгиршуда  эътироф  кард, ки  бақияи  маводи  нашъаовар  дар  дасти  шарикаш  — сокини  54 — солаи   ноҳияи  Панҷакент  мебошад. 
 
Дар  ҷараёни тафтиши  манзили  сокини  54 — солаи   ноҳияи  Панҷакент  як  халтаи  дорои  2  килограмм бангдона   пайдо  гардид. 
 
Шуъбаи тафтишоти Агентии  назорати  маводи  нашъаовар аз  рӯи  аломатҳои   намуди  ҷиноят, ки  дар  қисми  3  моддаи  200  КҶ ҶТ  пешбинӣ  шудааст,  парвандаи  ҷиноӣ  кушодааст.