Арҷгузорӣ ба поси хотири қурбоншудагон

Душанбе, 17 . 02. 2014. (АМИТ «Ховар», Лутфия Эшонзода).-Бахшида ба 25-солагии хуруҷи нерӯҳои Иттиҳоди Шӯравӣ аз Афғонистон дар назди муҷассамаи қаҳрамони Иттиҳоди Шӯравӣ, Александр Мироненко маросими поси хотир баргузор гардид. Дар чорабинии мазкур интернатсионалистони собиқадор, афсарону кормандони Вазорати корҳои дохилӣ, курсантон, сарбозон ва хизматчиёни ҳарбии ҷузъу томҳои мақомоти корҳои дохилӣ ширкат намуданд.
Дар ин рӯзи таърихӣ ба хотири қурбоншудагон ва поси хотираи ҷовидонаи онҳо, ки баҳри сулҳу осоиш ва оромии мардуми аҳли башар ҷоннисорӣ кардаанд, дар назди пайкараи қаҳрамони Иттиҳоди Шӯравӣ А.Мироненко гулчанбар гузошта шуда, дақиқаи хомушӣ эълон гардид.
Бояд тазаккур дод, ки ин чорабинӣ бо ташаббуси Иттиҳоди интернатсионалистони собиқадори Ҷумҳурии Тоҷикистон доир гардида, барои тарбияи ҳарбӣ-ватандӯстии насли наврас ва сафарбарии ҷавонон ба хизмати Ватан-Модар ва баланд бардоштани рӯҳияи ватандӯстӣ мусоидат менамояд.
Дар ин бора ба АМИТ «Ховар» аз маркази матбуоти ВКД хабар доданд.