Баррасии масоили сафарбарӣ ба ҳаҷ

Душанбе, 28.02.2014. (АМИТ «Ховар», Бекназари Абӯбакр). — Имрӯз дар назди муовини Сарвазири Ҷумҳурии Тоҷикистон Марҳабо Ҷабборӣ бо мақсади сафари дастаҷамъии шаҳрвандон ба ҳаҷ ҷаласа доир гардид.
  Дар ин ҷаласа ахбори раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Абдураҳим Холиқов шунида шуд.
   Дар ҷаласаи мазкур масъалаҳои бастани шартномаҳо миёни Кумитаи оид ба корҳои дин, танзими анъана ва ҷашну маросимҳои миллӣ ва ширкатҳои ҳавопаймоии «Тоҷик эйр» ва «Сомон эйр» ҷиҳати интиқоли зоирин тавассути тайёра, аз ҳисоби коршиносони ботаҷриба ва забондону сафардида тибқи озмун интихоб намудани роҳбаладон, пардохти маблағи сафари ҳаҷ танҳо дар нуқтаҳои қабули бонкӣ, синни ҳаҷравандагон аз 18 то 80-сола, ҳаҷи такрорӣ баъд аз гузаштани панҷ сол, расонидани кӯмаки аввалияи  тиббӣ ва таъмини ҳоҷиён бо доруворӣ ҳангоми маносики ҳаҷ дар мамлакати Арабистони Саудӣ, омода намудани «Роҳнамои ҳоҷиён», ҳангоми қабули ҳуҷҷатҳои зоирин роҳ надодан ба қонуншиканиҳо ва амалҳои коррупсионӣ, ташкил ва зиёд намудани дарсҳои омӯзишӣ барои ҳаҷравандагон ва дигар масъалаҳои зарурӣ мавриди баррасӣ қарор гирифтанд.
Дар кори ҷаласа намояндагони идораҳои марбута иштирок намуда, ҷиҳати беҳбуди кор фикру дархостҳои худро иброз намуданд. Аз ҷумла, пешниҳод гардид, ки ҳангоми интихоби роҳбаладон дар озмун донистани забони арабӣ ба инобат гирифта шавад. 
Дар фарҷоми ҷаласа М. Ҷабборӣ бо назардошти дархосту пешниҳодҳои иштирокдорон ба масъулин дастуру супоришҳои мушаххас дод.