Баррасии вазъи фазои динӣ дар Хатлон

 
Душанбе, 19.02.2014. (АМИТ «Ховар»).-Дирӯз ҳайати кории Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон бо роҳбарии раиси кумита Абдураҳим Холиқов бо мақсади иҷрои дастуру супоришҳои Президенти Ҷумҳурии Тоҷикистон вобаста ба корҳои фаҳмондадиҳию таблиғотӣ доир ба Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” ба вилояти Хатлон сафар намуд. Гурӯҳи кории кумита сафари худро аз маркази вилояти Хатлон-шаҳри Қурғонтеппа оғоз карда, бо фаъолон ва намояндагони аҳли ҷомеаи он дидору мулоқот намуд. Абдураҳим Холиқов бо таваҷҷуҳ ба аҳли толор таъкид намуд, ки Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” маҳз ба хотири ҳифзи манфиатҳои ҷомеа ба тасвиб расидааст ва он бояд самаранок татбиқ гардад.  Абдураҳим Холиқов дар ин дидор бо имомхатибон, имомон ва аҳли ҷомеаи шаҳри Қурғонтеппа роҷеъ ба вазъи фазои динӣ дар кишвар табодули назар намуд. 
Ҳамчунин 18-уми феврал гуруҳи кории кумита ба ноҳияи Бохтари вилояти Хатлон омада, бо беш аз 300 нафар  ходими дин, аҳли ҷомеа ва фаъолони он мулоқот намуд. Сафари гуруҳи корӣ дар вилояти Хатлон то 20-уми феврал идома меёбад. 
Қобили зикр аст, ки дар ин сафар гурӯҳи кории кумитаро намояндагони Вазорати маориф ва илм, Кумитаи ҷавонон, варзиш ва сайёҳӣ ва Кумитаи кор бо занон ва оилаи назди Ҳукумати Ҷумҳурии Тоҷикистон ҳамроҳӣ менамоянд.