Боғи навбунёди Наврӯзгоҳ макони сайри наврӯзӣ

       Душанбе, 25.02.2014.(АМИТ «Ховар», Марзия Саидзода).-Дар остонаи ҷашни байналмилалии Наврӯз дар Душанбе боғи нави Наврӯзгоҳ дар маросими ботантана ифтитоҳ мегардад, ки он барои сокинон ва меҳмонони пойтахт аз сӯи шаҳрдорӣ ҳадяи наврӯзист. Боғи мазкур дар масоҳати 12 гектар доман густурда, дар он ниҳолу дарахтон ва гулу буттаҳои ороишии нодир шинонида шудаанд. Инчунин боғи навбунёди Наврӯзгоҳ дорои фаввораҳои муҳташам буда, аз саргаҳи боғ шаршара ҷорист, ки он боғро шодоб мегардонад. Боғи мазкур аз ҳисоби буҷаи шаҳри Душанбе бунёд  шудааст. 
     Шавкат Саидов- сухангӯи шаҳрдори Душанбе дар сӯҳбат ба хабарнигори АМИТ «Ховар» гуфт, ки ҳамзамон дар остонаи ҷашни байналмилалии Наврӯз дар пойтахт як силсила иншооти гуногуни ҷашнӣ ба истифода дода шуда, инчунин санги асоси бархе аз биноҳои манзилию маишӣ гузошта мешавад. Ба истифода додани иншооти мухталиф дар остонаи ҷашни Наврӯзи байналмилалӣ чӣ дар пойтахт ва чӣ дар миқёси кишвар ба ҳукми анъана даромадааст ва он бозгӯкунандаи  раванди созандагию бунёдкорӣ дар кишварамон мебошад.