Дар Тоҷикистон 65 нафар ба ҳукми якумра маҳкум шудаанд

 
            Душанбе, 07.02.2014. (АМИТ «Ховар», Муқаддас Кушакова).- «Дар соли сипаригардида 18 ҳазору 336 ҷиноят ба қайд гирифта шуд, ки 1 ҳазору 743 ҷиноят ва ё 10,5 фоиз назар ба соли қаблӣ ва 6 ҳазор ва ё 47,8 фоиз назар ба чор соли пеш афзудааст»,-изҳори нигаронӣ намуд имрӯз дар нишасти матбуотӣ Салимзода Шерхони Одина, Прокурори генералии Ҷумҳурии Тоҷикистон.
    Прокурор ҳамчунин зикр кард, ки нисбат ба 146 нафар аъзои ташкилоти террористию экстремистӣ 68 парвандаи ҷиноятӣ мавриди тафтиш қарор дода шуда, 46 парванда нисбат ба 92 нафар ба судҳо ирсол гардидааст. Аз муомилоти ғайриқонунӣ дар соли гузашта зиёда аз 708 кг маводи нашъаовар  мусодира шуд. Дар мавриди ҳодисаҳои худкушӣ ва сӯиқасд ба он 567 ҳолат ба қайд гирифта шуда, аз ҷониби мақомоти прокуратура оид ба ҳодисаҳои ба худкушӣ расонидан 52 парвандаи ҷиноятӣ оғоз гардида, 45 парванда ба суд фиристода шуд. Бояд зикр кард, ки ин нишондод нисбат ба соли қаблӣ 37 ҳолат кам мебошад.  
   Ҳамчунин зимни нишасти матбуотӣ дар ҷавоб ба саволи хабарнигорон Салимзода Шерхони Одина иттилоъ дод, ки аз 3 ҳазору  297 нафари дар кофтуков қарордошта 1 ҳазору 333 нафар алҳол дасгир  шудааст.  
   Тибқи иттилоъ, дар Тоҷикистон 65 нафар бо ҳукми якумра аз озодӣ маҳрум гардидааст.