Густариши равобити фарҳангӣ

Душанбе, 26.02.2014. (АМИТ «Ховар», Муқаддас Темурзода).- Маҷлиси ҳисоботии Ҷамъияти дӯстӣ ва равобити фарҳангии Тоҷикистон (ҶДРФТ) бо кишварҳои хориҷӣ мувофиқи анъана ҳар сол охири моҳи феврал баргузор мегардад. Дар ҷаласаи имрӯза, аъзои Раёсати ҶДРФТ, масъулони намояндагиҳои ҶДРФТ дар вилоятҳо, раисон ва намояндагони Ҷамъиятҳои дӯстӣ бо кишварҳои алоҳида, ки дар доираи ҶДРФТ амал мекунанд, сарварони иттиҳодияҳо ва марказҳои миллию фарҳангии ақаллиятҳои миллии кишвар, ки бо ин ташкилоти собиқадор ҳамкорӣ доранд ва намояндагони ВАО иштирок намуданд. Сайдулло Хайруллоев, роҳбари ҶДРФТ оид ба ҷамъбасти фаъолияти ҷамъият дар соли сипаригардида ҳисобот дода, зикр намуд, ки дар давраи ҳисоботӣ ду ҷамъияти нав, аз ҷумла, Ҷамъияти дӯстии «Тоҷикистон — Озарбойҷон» ва Ҷамъияти дӯстии «Тоҷикистон — Япония» таъсис ёфт. Тибқи иттилоъ дар давраи ҳисоботӣ ҳамчунин бори нахуст дар Тоҷикистон бо Намояндагии «Россотрудничество» бо доираи васеи донишҷӯёни тоҷик ва хориҷӣ фестивали муҳташам баргузор гардид.Аз суханҳои роҳбари ҶДРФТ бармеояд, ки сол то сол ҳамкориҳои фарҳангӣ бо кишварҳои хориҷӣ густариш меёбад.Ҳамчунин дар ҷаласа сарварони иттиҳодияҳои ақаллиятҳои миллӣ ва роҳбарони марказҳои миллӣ оид ба корҳои анҷомдода дар соли гузашта, гузориш намуданд. Дар фарҷом оид ба нақшаҳои минбаъдаи ҷамъият пешниҳодҳо муҳокима шуданд.Лозим ба маврид аст, ки дар айни ҳол ҳамкории ҶДРФТ бо 19 ҷамъияти хориҷӣ идома дорад.