Истифодаи усули ҳисоби ғайринақдӣ дар БМТ

Душанбе, 06.02.2014. (АМИТ «Ховар», Кристина  Эрлих).-  Дар  ҷаласаи   навбатии   гурӯҳи  корӣ  барои  дидани  чораҳо ҷиҳати   коҳиш  додани  ҳаҷми пули нақд ҳангоми  муомилоти  тиҷоратӣ,  хариду  фурӯши  маҳсулот  ва  хидматрасонӣ, ки  дар Бонки  миллии  Тоҷикистон  баргузор  гардид,   масоили  марбут ба  истифодаи  усули  ҳисоби  ғайринақдӣ  мавриди  муҳокима  қарор  гирифтанд.
 
Тавре  ки  аз  хадамоти  матбуоти  Бонки  миллии  Тоҷикистон  ба   мухбири  АМИТ «Ховар»  хабар  доданд,  иштирокдорони  ҷаласа дар  робита бо  ин  чораҳои  марбут ба  вусъат  додани   усули  ҳисоби  ғайринақдӣ  тавассути  кортҳои  пардохти  бонкӣ,  истифодаи   моделҳои   имконпазири  банкинги  мобилиро, ки   намояндагони   вазорату  кумитаҳо ва  ташкилотҳои  масъулиятнок  пешниҳод  кардаанд,  муҳокима  намуданд.
 
Тасмим  гирифта шуд, ки  лоиҳаи  ҳуҷҷати  меъёрӣ  дар  бораи  тадбирҳои оид ба  вусъат  бахшидани  усули ҳисоби  ғайринақдӣ  тавассути  кортҳои  пардохти  бонкӣ  бо назардошти  тағйироту  иловаҳо  такмил  дода шавад.