Лату кӯби раиси тарабхона аз ҷониби донишҷӯён

Душанбе, 24.02.2014. (АМИТ «Ховар», Муқаддас Темурзода).-Аз маркази матбуоти Вазорати корҳои дохилии Ҷумҳурии Тоҷикистон иттилоъ доданд, ки кормандони милитсия панҷ нафар донишҷӯи Донишкадаи кўҳӣ-металлургии Тоҷикистонро бо гумони авбошӣ дастгир намуданд. Ҳангоми гузаронидани чораҳои фаврӣ-ҷустуҷӯӣ аз ҷониби кормандони милитсия дар тарабхонаи «Садбал», воқеъ дар шаҳри Хуҷанд донишҷӯёни донишкадаи номбурда Ҷовид Рӯзиев, соли таваллудаш 1994, Саидшараф Сангинов, соли таваллудаш 1995, Муҳаммадалӣ Сангинов, Ҷамшед Ёқубов ва Мурод Сангинов, ки соли таваллудашон 1993, сокинони ноҳияи Мастчоҳ буданд, тартиботи ҷамъиятиро аз ҳиссиёти авбошӣ дағалона вайрон карда, раиси тарабхонаи «Садбал» Абдураҳмон Ғафуров, соли таваллудаш 1983 ва корманди тарабхона Алишер Ғафуров, соли таваллудаш 1984, истиқоматкунандагони шаҳри Хуҷандро лату кўб намудаанд. Нисбат ба ҳодисаи мазкур парвандаи ҷиноӣ оғоз гардида, тафтиш идома дорад.