Лоиҳаи нави Иттиҳоди Аврупо дар Тоҷикистон

Душанбе, 26.02.2014. (АМИТ «Ховар»).- Намояндагии  Иттиҳоди  Аврупо  дар  Тоҷикистон  лоиҳаи  нави  «SECRET:  Ҳуқуқҳои   иҷтимоию  иқтисодӣ  ва  фарҳангии  маҳбусон  ва  маҳбусони собиқ  дар  Тоҷикистон» дар  ҳошияи Барномаи  «Ибтикори  Аврупо  дар бахши  демократия ва ҳуқуқҳои  инсон»  — ро дастгирӣ  намуд. 
 
Тавре  ки  аз намояндагии Иттиҳоди  Аврупо  дар  ҶТ  хабар  доданд,  лоиҳаро  Пажӯҳишгоҳи  ҳамкории  байналмилалии Ассотсиатсияи  олмонии  донишгоҳҳои  халқӣ  якҷоя  бо  ду   шарики  маҳаллӣ  аз  ҷумлаи  Созмони  ҷамъиятии  «Дафтари ҳуқуқҳои  инсон ва  риояи қонуният»  ва  Созмони  ҷамъиятии «Ҷаҳон»  рӯи  кор  меорад.  Лоиҳаро  Комиссияи  Аврупо  ва Вазорати  федералии  ҳамкорӣ ва рушди  иқтисодии  Олмон  маблағгузорӣ  менамоянд.
 
Лоиҳаи  мазкур  дар  шаҳраки  Норак (маҳбаси  занонаи №3),  ҳамчунин  дар  шаҳрҳои  Душанбе,  Хоруғ,  Хуҷанд ва  Қӯрғонтеппа  тайи 24  моҳ  амалӣ  мегардад.  Татбиқи   лоиҳа  ба рушду  тақвияти   демократия  ва  волоияти  қонун,  ҳуқуқу  озодиҳои  асосӣ  дар  Тоҷикистон бо  василаи  беҳдошти  дастрасӣ ба  таҳсилоти  занони маҳбус  мусоидат мекунад.