Муҳоҷирон аз хидмати касбии адвокатҳо бархӯрдоранд

Душанбе, 25.02.2014. (АМИТ «Ховар»).- Бинобар  афзудани  муроҷиати  муҳоҷирони  меҳнатӣ —  шаҳрвандони  ҶТ,   як  нафар  адвокат (ҳимоягар)  дар маркази  Намояндагии оид ба муҳоҷирати  Вазорати  меҳнат,  муҳоҷират ва шуғли  аҳолии  ҶТ  дар ФР  воқеъ  дар  шаҳри  Маскав   ба  кор  шурӯъ  намуд, ки  ӯ   мустақиман  ба  хидматрасонии  адвокатӣ  машғул  мешавад.
 
Роҳбари Намояндагӣ Асрор  Одинаев  ин  ибтикоротро  шарҳ дода,   зикр  намуд, ки  яке  аз  мақсадҳои  муҳими фаъолияти муассиса  иборат  аз   расонидани  ёрии  ҳуқуқӣ  ба  муҳоҷирони  меҳнатӣ мебошад.  «Мо  бо  назардошти  ин  бо  мақомоти   давлатии Федератсияи  Русия, аз ҷумла бо  Хадамоти  федералии  муҳоҷирати он,  мақомоти  корҳои дохилӣ  ва   прокуратураи  ин  кишвар зич  ҳамкорӣ  менамоем. Вале  бо   назардошти   хусусияту  мураккабияти  проблемаҳои  ҳамватанонамон,  ҳалли  баъзеи  онҳо   вобаста ба   хидматрасонии  адвокатҳо  мебошад,  ки  имрӯз  онҳоро  ба  қадри имкон  ҳал  менамоем», —  зикр  намуд  Асрор  Одинаев.
 
Мувофиқи  суханони Асрор  Одинаев,  ин  лоиҳа ба  шарофати  дастгирии   молиявии  Маркази  созмони байналмилалии  муҳоҷират  воқеъ  дар  Маскав  имконпазир  гардид.