Муҳокимаи муқаррароти қонун

Душанбе, 20.02.2014. (АМИТ “Ховар”).- Имрӯз дар Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон ҷаласа оид ба риояи талаботи моддаҳои 17 ва 22 Қонуни Ҷумҳурии Тоҷикистон «Дар бораи озодии виҷдон ва иттиҳодияҳои динӣ» баргузор гардид. Дар ин бора ба АМИТ “Ховар” сухангӯи кумитаи мазкур Афшини Муқим хабар дод. 
Ба иттилои манбаъ дар кори ҷаласа раиси кумита Абдураҳим Холиқов, муовинони раиси кумита, раиси Маркази исломии Тоҷикистон Саидмукаррам Абдулқодирзода, намояндагони дастгоҳи иҷроияи Президенти Ҷумҳурии Тоҷикистон, Вазорати корҳои дохилӣ, Вазорати фарҳанг, Хадамоти гумрук, КВД “Тоҷиккино”, Кумитаи телевизион ва радио, раисони комиссияҳои коршиносони вилоятҳои Суғду Хатлон, мудирони бахшҳо оид ба корҳои дини шаҳри Душанбе, директорони матбаа,  нашриёт ва студияҳои сабти маводи аудиовизуалӣ, сархатибони масҷидҳои ҷомеи марказии шаҳри Душанбе ва фурўшандагони мағоза ва дўконҳо иштирок намуданд. 
Зимни ҷаласаи мазкур як силсила масоили ҷорӣ роҷеъ ба татбиқи муқаррароти Қонуни Ҷумҳурии Тоҷикистон “Дар бораи озодии виҷдон ва иттиҳодияҳои динӣ” баррасӣ гардида, иштирокдорон ҷиҳати  дарёфти роҳҳои татбиқи босамари он ва рафъи мушкилоти ҷойдошта табодули назар намуданд.