Муҳокимаи самтҳои рушд миёни Нуриддин Саидов ва Дирк Меганк

Душанбе, 12.02.2014.(АМИТ «Ховар»,Фарзона Достонзода).- Ҳайати директорати генералӣ оид ба рушд ва ҳамкориҳои Комиссияи Аврупо аз Вазорати маориф ва илми Ҷумҳурии Тоҷикистон  11 феврал дар Душанбе дидан кард. 
Аз Вазорати маорифи кишвар ба АМИТ «Ховар» иттилоъ доданд, ки зимни вохӯрии вазири маориф ва илм Нуриддин Саидов ва директори шуъбаи кишварҳои Осиё, Осиёи Марказӣ ва ҳавзаи уқёнуси Ороми директорати мазкур Дирк Меганк самтҳои рушди ҳамкориҳои дуҷонибаи Иттиҳоди Аврупо барои солҳои 2014-2020 мавриди муҳокима қарор гирифтанд.
Нуриддин Саидов, вазири маориф ва илми ҷумҳурӣ ба ҳамкориҳои Тоҷикистону Иттиҳоди Аврупо, махсусан дар самти маорифу илм баҳои баланд дода, омодагии вазоратро барои ҳамкориҳои дуҷонибаи пурсамар дар самти таҳсилоти ибтидоӣ, миёна ва олии касбӣ изҳор дошт. Ҳамзамон  вазир дар бораи зинаҳои таҳсилоти томактабӣ, миёнаи умумӣ, таҳсилоти фарогир, фарогирии кӯдакон ба таҳсил, шароити таҳсил дар муассисаҳои таълимӣ маълумоти муфассал дод.
Дирк Меганк ба фарогирии кӯдакон ба таҳсил ва шароити фароҳам барои онҳо таваҷҷуҳ намуда, самтҳои ҳамкориҳои минбаъдаро пешниҳод намуд.
Ҷонибҳо ба хулосае омаданд, ки муҳокимаи масъалаи рушди ҳамкориҳои дуҷониба дар вохӯриҳои минбаъда идома ёфта ва самтҳои асосии рушди ин ҳамкориҳо тасдиқи худро хоҳанд ёфт.