Муаррифии татқиқоти нав

 Душанбе, 20.02.2014.(АМИТ «Ховар», Марзия Саидзода).- «Ғайримарказкунонии  фискалӣ дар Ҷумҳурии Тоҷикистон: дастовардҳо, омилҳои асосӣ ва дурнамо»-  таҳти чунин унвон имрӯз дар Душанбе суҳбати мизи мудаввар доир гардид, ки созмондиҳандаи он котиботи назди  Кумитаи иқтисод ва молияи Маҷлиси намояндагони Маҷлиси Олии кишвар аст.
      Чорабинии мазкур дар доираи  лоиҳаи «Тақвияти иқтидори Парлумони Ҷумҳурии Тоҷикистон дар бахши молияи давлатӣ» созмон дода шуда, дар он намояндагони кумитаҳои палатаи поёнии Парлумони мамлакат ва Бонки ҷаҳонӣ ширкат доштанд.
     Ҳадафи нишасти мазкур  мусоидат ба амалишавии ислоҳот дар самти идораи молияи давлатӣ тавассути беҳгардонии муносибатҳои  байнибуҷетист. Зикр гардид, ки аз сӯи Ҳукумати Ҷумҳурии Тоҷикистон баҳри таъмини рушди  устувори иқтисоди кишвар,  баланд бардоштани сатҳи иҷтимоии аҳолӣ тадбирҳои судманд андешида мешаванд. 
 Дар нишаст натиҷаи татқиқоти ғайримарказкунонии  фискалӣ дар кишвар, ки аз ҷониби мушовири байналмилалӣ Пол Бернд тибқи дархости  котиботи назди Кумитаи  иқтисод ва молияи Маҷлиси намояндагон гузаронида шудааст, муаррифӣ гардид.